महाबळेश्वर निवडणूक निर्णय अधिकारींचा पत्रकारांकडून निषेध; कार्यालयाबाहेर ठिय्या आंदोलन सुरू...................
महाबळेश्वर नगरपालिका निवडणूक प्रक्रियेत उमेदवारी छाननीची माहिती वेळेत न मिळाल्याने येथील पत्रकारांनी आज निवडणूक निर्णय अधिकारींचा तीव्र निषेध नोंदवत कार्यालयाबाहेर ठिय्या आंदोलन सुरू केले. छाननीसंबंधी आवश्यक यादी उपलब्ध करून देण्यात होत असलेल्या विलंबामुळे प्रसारमाध्यमांत प्रचंड नाराजी पसरली आहे.
मिळालेल्या माहितीप्रमाणे, काल दाखल झालेल्या उमेदवारांच्या अर्जांची अद्ययावत यादी आजपर्यंत देण्याचे आश्वासन प्रशासनाकडून देण्यात आले होते. मात्र सुमारे २५ तास उलटूनही यादी उपलब्ध करून देण्यात निवडणूक कार्यालयाकडून टाळाटाळ केल्याचा आरोप पत्रकारांनी केला आहे. संपूर्ण जिल्ह्यातील इतर नगरपालिकांची यादी वेळेत मिळत असताना केवळ महाबळेश्वरमध्येच अशी दिरंगाई का होते आहे, याबाबत अधिकारी कोणताही स्पष्ट खुलासा देण्यास तयार नसल्याने संताप अधिक वाढला आहे.
यापूर्वी प्रांताधिकारी डॉ. योगेश खरमाटे आणि जिल्हाधिकारी संतोष पाटील यांच्याकडेही पत्रकारांनी तक्रार मांडली होती. दोन्ही वरिष्ठ अधिकाऱ्यांनी तात्काळ यादी उपलब्ध करण्याचे आश्वासन दिले होते. मात्र स्थानिक पातळीवरील अधिकाऱ्यांनी या आदेशाकडे दुर्लक्ष करीत जाणूनबुजून विलंब केल्याचा आरोप पत्रकारांनी केला आहे.
यामुळे "वेठीस धरणे" सुरू असल्याचा आरोप करत पत्रकारांसोबत काही उमेदवारांनीही असंतोष व्यक्त केला. प्रशासनाची निष्क्रियता आणि पारदर्शकतेचा अभाव लक्षात घेता अखेर आज पत्रकारांना ठिय्या आंदोलनाचा मार्ग स्वीकारावा लागला आहे.
पत्रकारांच्या या तीव्र आंदोलनामुळे निवडणूक प्रक्रियेतील पारदर्शकता, प्रशासनाची जबाबदारी आणि वेळेचे नियोजन या प्रश्नांवर मोठी चर्चा सुरू झाली आहे.
Social Plugin