तिन दिवस उलटले तरी एकही नामनिर्देशन पत्र दाखल नाही महाबळेश्वरमध्ये संभ्रमाचे वातावरण*

 तिन दिवस उलटले तरी एकही नामनिर्देशन पत्र  दाखल नाही

   महाबळेश्वरमध्ये संभ्रमाचे वातावरण*

महाबळेश्वर:- मध्ये नगरपालिका निवडणुक प्रक्रिया सुरू झाली असून नामनिर्देशन पत्र दाखल करण्याची तारीख जाहीर होऊन तीन दिवस उलटले तरी कोणत्याही पक्षाकडून किंवा अपक्ष एकही नामनिर्देशन पत्र दाखल न झाल्याने तसेच  राजकीय दृष्ट्या नाट्यमय घडामोडी सुरू आहेत, यामुळे मतदारांमध्ये संभ्रमाचे वातावरण निर्माण झाले आहे.

हि परिस्थिती महाबळेश्वरमधील राजकीय पक्षांमध्ये असमंजस आणि धोरणात्मक बदल दर्शवत आहे. शिवसेना पक्षाने नगराध्यक्षपदी कुमार शिंदे यांना उमेदवारी जाहीर केली असून, उपमुख्यमंत्री एकनाथ शिंदे आणि पालकमंत्री शंभूराज देसाई यांच्या नेतृत्वाखाली शिवसेना महाबळेश्वर निवडणूक लढवणार आहे. मात्र इतर पक्षांमधील मतभेद, उमेदवार निवडीतील उशीर तसेच इतर राजकीय गटांच्या रणनीतींमुळे अडकलेली नामनिर्देशन प्रक्रिया मतदारांमध्ये गोंधळ निर्माण करत आहे. 

जिल्ह्यात इतर ठिकाणी  नामनिर्देशन अर्ज दाखल होऊ लागले असतानाही, महाबळेश्वरमध्ये अद्यापर्यंत एकही नामनिर्देशनत्र दाखल झाले नाही हे   ठळकपणे पाहायला मिळत आहे. राज्य निवडणूक आयोगाने आगामी निवडणुकीसाठी उमेदवारी अर्ज भरण्याची अंतिम मुदत १७ नोव्हेंबर ठेवली असून, त्यानंतर छाननीसह उमेदवारांची अंतिम यादी जाहीर करण्यात येणार आहे. मात्र महाबळेश्वरमध्ये तिन दिवस उलटल्यानंतरही कोणत्याही पक्षाकडून किंवा स्वतंत्र उमेदवाराकडून नामनिर्देशन पत्र न दाखल होणे ही अनोखी बाब समजली जात आहे.

 

एकीकडे शिवसेनेतून नगराध्यक्ष पदासाठी कुमार शिंदे शड्डू ठोकून उभे असताना,  राष्ट्रवादी मध्ये नासीर मुलाणी व सुनील शिंदे यांच्यातील तिढा सोडविण्यात पक्षाला अद्यापही यश आले नाही तर दुसरीकडे माजी नगरसेवक संतोष शिंदे यांच्या कार्यकर्त्यांनी "फिक्स नगराध्यक्ष" असे स्टेटस ठेवल्याने त्यांनी देखील नगराध्यक्ष पदासाठी चाचपणी सुरू केल्याच्या चर्चांना उधाण आले आहे.

या सर्व घडामोडींमुळे महाबळेश्वरातील मतदार संभ्रमात असून पुढील राजकीय परिस्थितीवर संशय निर्माण झाला आहे. या राजकीय नाट्यामुळे पालिकेचे शासन व्यवस्थापन पुढील दिवसात कितपत प्रभावित होईल, हे पाहणे महत्त्वाचे राहणार आहे. त्यामुळे आगामी काही दिवस महाबळेश्वरमधील राजकीय हालचालीवर सर्वांची नजर राहणार आहे.