गिरिस्थान प्रशालेचा रिटेल विक्री कौशल्य उपक्रम यशस्वी ; झेंडू फुलांच्या स्टॉलला मिळाला उत्स्फूर्त प्रतिसादमहाबळेश्वर : शासनाच्या व्यवसाय शिक्षणातील रिटेल या विषयांतर्गत गिरिस्थान प्रशाला व कनिष्ठ महाविद्यालय, महाबळेश्वर येथील इयत्ता ११ वी व १२ वीच्या विद्यार्थ्यांनी झेंडूच्या फुलांचा स्टॉल लावून रिटेल विक्रीचे कौशल्य शिकण्याचा यशस्वी प्रयत्न केला. विषय शिक्षक श्री. अभिषेक साळुंखे यांच्या मार्गदर्शनाखाली दीपावली सुट्टीचा सदुपयोग करून राबविण्यात आलेल्या या प्रकल्पात विद्यार्थ्यांना विक्री कौशल्य, ग्राहक सेवा, आर्थिक शिस्त आणि जाहिरात अशा महत्त्वपूर्ण कौशल्यांचा प्रत्यक्ष अनुभव घेता आला. तसेच संघभावना, वेळेचे व्यवस्थापन आणि आकर्षक सादरीकरणाचे महत्त्व जाणून घेतले.गेल्या वर्षी विद्यार्थ्यांनी १०० किलो झेंडू फुलांची विक्री करत यश मिळवले होते, तर यंदा दुसऱ्या वर्षी त्यांनी तोच विक्रम मोडीत काढत तब्बल १२० किलो झेंडू फुलांची विक्री केली.दिवाळीच्या काळात बाजारपेठेत स्पर्धात्मक वातावरण असतानाही विद्यार्थ्यांनी फुलांचे आकर्षक हार तयार करणे, जाहिरात पोस्टर्स, सवलती, पर्यावरणपूरक पॅकेजिंग अशा कल्पक उपायांनी ग्राहकांना आकर्षित केले.
या उपक्रमात इयत्ता ११ वीतील श्रुती वाडकर, रिया कांबळे, श्रेया ढेबे, दिशा केळगणे, विद्या सपकाळ, अंकिता कात्रट, तनिष्का शिंदे, इकरा वारुणकर, संचिता काळे, प्रज्ञा घाडगे, आदिती घाडगे तसेच इयत्ता १२ वीतील श्रुती घाडगे, तृप्ती जाधव, तन्वी जाधव, आदित्य घाडगे, संस्कार जाधव, शुभम सपकाळ, युवराज कात्रट, मंथन मोहिते, शुभम ढेबे,करण ढेबे यांनी सहभाग घेतला.महाबळेश्वर गिरिस्थान नगरपरिषदेचे मुख्याधिकारी तथा प्रशासक श्री. योगेश बाळकृष्ण पाटील साहेब यांनी विद्यार्थ्यांच्या या नाविन्यपूर्ण प्रकल्पाचे अभिनंदन केले.
गिरिस्थान प्रशालेचे प्राचार्य श्री. पी. आर. माने यांच्या मार्गदर्शनाखाली व रिटेल विषयाचे उपक्रमशील शिक्षक श्री. अभिषेक साळुंखे यांच्या नियोजनाखाली हा उपक्रम यशस्वीपणे पार पडला.
या प्रकल्पाला शिक्षक, पालक,माजी विद्यार्थी, पत्रकार, स्थानिक नागरिक तसेच पर्यटकांकडून देखील उत्स्फूर्त प्रतिसाद मिळाला.
Social Plugin