हृदयातले 'एकनाथ': राजस्थानहून आलेल्या ८ वर्षांच्या चिमुरड्याचा हट्ट पूर्ण; मुख्यमंत्री शिंदे यांनी जिंकली मने!

महाबळेश्वर टाईम्स

महाबळेश्वर : प्रतिनिधी

राजकारणातील व्यस्तता आणि जबाबदाऱ्यांच्या पलीकडे जाऊन मुख्यमंत्री एकनाथजी शिंदे यांचे 'सर्वसामान्यांचा मुख्यमंत्री' हे रूप पुन्हा एकदा महाबळेश्वरमध्ये पाहायला मिळाले. आपल्या लाडक्या नेत्याला भेटण्यासाठी आणि त्यांच्यासोबत एक फोटो काढण्यासाठी राजस्थानहून हजारो किलोमीटरचा प्रवास करून आलेल्या ८ वर्षांच्या कार्तिक रमेश चौधरी या चिमुरड्याचा हट्ट साहेबांनी मोठ्या मायेने पूर्ण केला.

आईची माया सोडून केवळ साहेबांच्या भेटीसाठी प्रवास

मूळचे राजस्थानचे असलेले रमेश चौधरी हे महाबळेश्वरमध्ये आईस्क्रीमचा व्यवसाय करतात. ते मुख्यमंत्री एकनाथ शिंदे यांचे कट्टर समर्थक आहेत. काही दिवसांपूर्वी रमेश चौधरी आपल्या गावी राजस्थानला गेले होते. तिथे त्यांच्या ८ वर्षांच्या मुलाने, कार्तिकने, "मला शिंदे साहेबांसोबत फोटो काढायचा आहे," असा हट्ट धरला. साहेबांवरील प्रेमापोटी या चिमुरड्याने हजारो किलोमीटर दूर असलेल्या आपल्या आईला सोडून वडिलांसोबत महाबळेश्वर गाठले.

एक महिन्याची प्रतीक्षा आणि 'तो' सुवर्णक्षण

साहेबांची भेट व्हावी यासाठी कार्तिक गेल्या महिनाभरापासून महाबळेश्वरमध्ये वाट पाहत होता. नुकतेच मुख्यमंत्री एकनाथजी शिंदे हे महाबळेश्वर येथील छत्रपती शिवाजी महाराज चौक येथून आपल्या दरे गावाकडे जात होते. यावेळी त्यांच्यासोबत असलेल्या विजयभाऊ नायडू यांनी साहेबांना कार्तिकबद्दल सांगितले. "हा मुलगा फक्त तुम्हाला भेटण्यासाठी राजस्थानहून आला असून महिनाभरापासून आपली वाट पाहत आहे," हे ऐकताच साहेबांनी ताफा थांबवला.

आपुलकीचा स्पर्श आणि मायेची थाप

कार्तिकची ओढ पाहून मुख्यमंत्री भावूक झाले. त्यांनी तातडीने रमेश चौधरी आणि लहानग्या कार्तिकला जवळ बोलावले. साहेबांनी अत्यंत प्रेमाने कार्तिकच्या डोक्यावरून हात फिरवत त्याची विचारपूस केली आणि त्याच्यासोबत आनंदाने फोटो काढला.

"साहेबांच्या या साधेपणामुळेच ते आज कोट्यवधी जनतेच्या हृदयावर राज्य करत आहेत. एका सामान्य कार्यकर्त्याच्या मुलाची भावना समजून घेऊन त्यांनी दिलेली ही भेट आमच्यासाठी आयुष्याची शिदोरी आहे," अशी भावना रमेश चौधरी यांनी व्यक्त केली.

महाबळेश्वरच्या चौकात घडलेल्या या प्रसंगामुळे उपस्थितांचे डोळे पाणावले. 'सर्वसामान्यांचा नेता' कसा असावा, याचा प्रत्यय पुन्हा एकदा साहेबांनी आपल्या कृतीतून दिला आहे.

यावेळी शहरप्रमुख विजय नायडू,सतीश ओंबळे, उस्मान खारखंडे,राहुल साळुंखे, सचिन वाईकर, किरण मोरे, प्रभा नायडू, अपूर्वा डोईफोडे आदी शिवसैनिक उपस्थित होते.

बातम्या व जाहिराती साठी 📰 संपर्क

संपादक :- राहुल शेलार

📱 9765576377

कार्यकारी संपादक :- रियाज मुजावर

📱 9403546 485