कराडच्या विकासाला नवी झेप; 3.47 किमीचा भव्य उड्डाणपूल वाहतुकीस समर्पित.
महाबळेश्वर टाईम्स
कराड | प्रतिनिधी
पश्चिम महाराष्ट्राच्या वाहतूक व्यवस्थेत ऐतिहासिक ठरणारा कराड येथील भव्य उड्डाणपूल अखेर आज (दि. 21 जून 2026) सर्वसामान्यांसाठी खुला करण्यात आला. पुणे–बंगळुरू राष्ट्रीय महामार्गावरील प्रवास अधिक गतिमान, सुरक्षित आणि अखंडित करण्याच्या दृष्टीने हा प्रकल्प महत्त्वाचा टप्पा मानला जात आहे.
राज्याचे मंत्री शिवेंद्रसिंहराजे भोसले, खासदार उदयनराजे भोसले, आमदार डॉ. अतुल भोसले आणि आमदार मनोज घोरपडे यांच्या हस्ते या उड्डाणपुलाचे लोकार्पण संपन्न झाले. या प्रसंगी नागरिक, व्यापारी, वाहनचालक तसेच विविध क्षेत्रातील मान्यवर मोठ्या संख्येने उपस्थित होते.
पुणे–बंगळुरू राष्ट्रीय महामार्गाच्या सहापदरीकरण प्रकल्पांतर्गत उभारण्यात आलेला हा उड्डाणपूल तब्बल 3.47 किलोमीटर लांबीचा आणि 29.5 मीटर रुंदीचा आहे. पंकज हॉटेल परिसरापासून नांदलापूरपर्यंत विस्तारलेला हा पूल सातारा–कागल महामार्ग प्रकल्पातील सर्वात मोठा उड्डाणपूल म्हणून ओळखला जात आहे. तब्बल 115 मजबूत खांबांवर उभारलेली ही भव्य वास्तू आधुनिक अभियांत्रिकी कौशल्याचा उत्कृष्ट नमुना ठरत आहे.
या उड्डाणपुलामुळे कराड शहरातील वाहतूक कोंडीला मोठ्या प्रमाणात आळा बसणार असून पुणे, सातारा, सांगली, कोल्हापूर तसेच बंगळुरूकडे जाणाऱ्या वाहनांचा प्रवास अधिक सुलभ होणार आहे. विशेषतः अवजड वाहने आणि लांब पल्ल्याच्या प्रवाशांचा वेळ व इंधनाची बचत होण्यास मदत मिळणार आहे.
कराड हे पश्चिम महाराष्ट्रातील महत्त्वाचे वाहतूक केंद्र मानले जाते. मुंबई, पुणे, सांगली, कोल्हापूर आणि दक्षिण भारताला जोडणारा हा प्रमुख मार्ग असल्याने दररोज हजारो वाहनांची येथे वर्दळ असते. नव्याने सुरू झालेल्या उड्डाणपुलामुळे या परिसराच्या आर्थिक, औद्योगिक आणि व्यापारी विकासालाही चालना मिळणार असल्याचे मत व्यक्त होत आहे.
नागरिकांच्या दीर्घ प्रतीक्षेनंतर पूर्णत्वास आलेला हा प्रकल्प कराडच्या विकासाच्या वाटचालीतील एक महत्त्वपूर्ण मैलाचा दगड ठरत असून, भविष्यातील आधुनिक आणि सक्षम वाहतूक व्यवस्थेची नांदी मानला जात आहे.
Social Plugin