महाबळेश्वरात २३ जून रोजी ‘एकल महिला दिन’ निमित्त सक्षमीकरण व लाभवितरण उपक्रमांचे आयोजन

महाबळेश्वर टाईम्स

महाबळेश्वर : संदेश भिसे

महिला व बालविकास विभाग, पंचायत समिती महाबळेश्वर, तहसील कार्यालय महाबळेश्वर आणि महाराष्ट्र राज्य ग्रामीण जीवनोन्नती अभियान (उमेद) यांच्या संयुक्त विद्यमाने आगामी २३ जून २०२६ रोजी तालुकास्तरावर भव्य ‘एकल महिला दिन’ साजरा करण्यात येणार आहे. या निमित्ताने एकल महिलांसाठी विविध जनजागृती, सक्षमीकरण आणि लाभवितरण उपक्रमांचे विशेष आयोजन करण्यात आले आहे.

विविध शासकीय योजनांचा मिळणार लाभ

महिला व बालविकास विभागाच्या निर्देशानुसार आयोजित या कार्यक्रमात एकल महिलांच्या सामाजिक, आर्थिक आणि शैक्षणिक सक्षमीकरणावर भर दिला जाणार आहे. शासनामार्फत राबविण्यात येणाऱ्या विविध कल्याणकारी योजनांची माहिती यावेळी महिलांना दिली जाईल. तसेच त्यांच्या समस्या, अडचणी आणि अपेक्षा जाणून घेऊन त्यावर योग्य मार्गदर्शन केले जाईल.

कार्यक्रमातील प्रमुख आकर्षणे व सेवा :

शासकीय ओळखपत्रे व दाखले: आधार कार्ड, आयुष्मान भारत कार्ड आणि इतर आवश्यक शासकीय दाखल्यांचे वितरण व मार्गदर्शन.

आर्थिक स्वावलंबन: स्वयंसहाय्यता बचत गटांमध्ये सहभाग, रोजगार आणि स्वयंरोजगाराच्या विविध संधींची माहिती.

महिला सक्षमीकरण: महिला व बालविकास विभाग तसेच 'उमेद' अभियानांतर्गत उपलब्ध उपक्रमांचे मार्गदर्शन.

यशोगाथांचा गौरव: विविध क्षेत्रांत उल्लेखनीय कार्य करणाऱ्या एकल महिलांचा विशेष सत्कार करून त्यांच्या यशोगाथांचा गौरव केला जाईल.

पूर्वतयारीसाठी समन्वय बैठक संपन्न

या कार्यक्रमाच्या यशस्वी नियोजनासाठी महाबळेश्वर तहसीलदार कार्यालयात नुकतीच एक समन्वय बैठक पार पडली. या बैठकीस तहसीलदार सचिन मस्के यांच्यासह विविध विभागांचे शासकीय अधिकारी उपस्थित होते. तालुक्यातील एकल महिलांना समाजाच्या मुख्य प्रवाहात आणणे, त्यांचा आत्मविश्वास वाढविणे आणि त्यांना स्वावलंबी बनवणे हा या उपक्रमाचा मुख्य उद्देश असल्याचे बैठकीत सांगण्यात आले.

कार्यक्रमाची वेळ व ठिकाण :

दिनांक: २३ जून २०२६

वेळ: सकाळी १२:०० वाजता

ठिकाण : खादी ग्रामोद्योग मधसंचनालय, महाबळेश्वर

तालुक्यातील सर्व एकल महिलांनी या कार्यक्रमास मोठ्या संख्येने उपस्थित राहून शासकीय योजनांचा लाभ घ्यावा आणि स्वतःचे आर्थिक व सामाजिक सक्षमीकरण साधावे, असे आवाहन महाबळेश्वर पंचायत समिती, तहसील कार्यालय, महिला व बालविकास विभाग आणि 'उमेद' अभियानाच्या वतीने करण्यात आले आहे.

बातम्या व जाहिराती साठी 📰 संपर्क

संपादक :- राहुल शेलार

📱 9765576377

कार्यकारी संपादक :- रियाज मुजावर

📱 9403546 485